Texts

śrīgaṇādhipataye namaḥ / (1.1) Par.?

sarasvatyai namaḥ / (1.2) Par.?

atha śrīgaruḍamahāpurāṇaṃ prārabhyate / (1.3) Par.?

tatrādau karmakāṇḍākhyaḥ pūrvakhaṇḍaḥ prārabhyate / (1.4) Par.?

oṃ nārāyaṇaṃ namaskṛtya naraṃ caiva narottamam / (1.5) Par.?

devīṃ sarasvatīṃ caiva tato jayamudīrayet / (1.6) Par.?

oṃ ajamajaramanantaṃ jñānarūpaṃ mahāntaṃ śivamamalamanādiṃ bhūtadehādihīnam / (1.7) Par.?

sakalakaraṇahīnaṃ sarvabhūtasthitaṃ taṃ harim amalam amāyaṃ sarvagaṃ vanda ekam // (1.8) Par.?

namasyāmi hariṃ rudraṃ brahmāṇaṃ ca gaṇādhipam / (2.1) Par.?

devīṃ sarasvatīṃ caiva manovākkarmabhiḥ sadā // (2.2) Par.?

sūtaṃ paurāṇikaṃ śāntaṃ sarvaśāstraviśāradam / (3.1) Par.?

viṣṇubhaktaṃ mahātmānaṃ naimiṣāraṇyam āgatam // (3.2) Par.?

tīrthayātrāprasaṅgena upaviṣṭaṃ śubhāsane / (4.1) Par.?

dhyāyantaṃ viṣṇumanaghaṃ tamabhyarcyāstuvankavim // (4.2) Par.?

śaunakādyā mahābhāgā naimiṣīyāstapodhanāḥ / (5.1) Par.?

munayo ravisaṅkāśāḥ śāntā yajñaparāyaṇāḥ // (5.2) Par.?

ṛṣaya ūcuḥ / (6.1) Par.?

sūta jānāsi sarvaṃ tvaṃ pṛcchāmastvāmato vayam / (6.2) Par.?

devatānāṃ hi ko deva īśvaraḥ pūjya eva kaḥ // (6.3) Par.?

ko dhyeyaḥ ko jagatsraṣṭā jagat pāti ca hanti kaḥ / (7.1) Par.?

kasmātpravartate dharmo duṣṭahantā ca kaḥ smṛtaḥ // (7.2) Par.?

tasya devasya kiṃ rūpaṃ jagatsargaḥ kathaṃ mataḥ / (8.1) Par.?

kairvrataiḥ sa tu tuṣṭaḥ syātkena yogena vāpyate // (8.2) Par.?

avatārāśca ke tasya kathaṃ vaṃśādisambhavaḥ / (9.1) Par.?

varṇāśramādidharmāṇāṃ kaḥ pātā kaḥ pravartakaḥ // (9.2) Par.?

etatsarvaṃ tathānyacca brūhi sūta mahāmate / (10.1) Par.?

nārāyaṇakathāḥ sarvāḥ kathayāsmākamuttamāḥ // (10.2) Par.?

sūta uvāca / (11.1) Par.?

purāṇaṃ gāruḍaṃ vakṣye sāraṃ viṣṇukathāśrayam / (11.2) Par.?

garuḍoktaṃ kaśyapāya purā vyāsācchrutaṃ mayā // (11.3) Par.?

eko nārāyaṇo devo devānāmīśvareśvaraḥ / (12.1) Par.?

paramātmā paraṃ brahma janmādyasya yato bhavet // (12.2) Par.?

jagato rakṣaṇārthāya vāsudevo 'jaro 'maraḥ / (13.1) Par.?

sa kumārādirūpeṇa avatārānkarotyajaḥ // (13.2) Par.?

hariḥ sa prathamaṃ devaḥ kaumāraṃ sargamāsthitaḥ / (14.1) Par.?

cacāra duścaraṃ brahman brahmacaryamakhaṇḍitam // (14.2) Par.?

dvitīyaṃ tu bhavāyāsya rasātalagatāṃ mahīm / (15.1) Par.?

uddhariṣyannupādatte yajñeśaḥ saukaraṃ vapuḥ // (15.2) Par.?

tṛtīyamṛṣisargaṃ tu devarṣitvamupetya saḥ / (16.1) Par.?

tantraṃ sātvatamācaṣṭe naiṣkarmyaṃ karmaṇāṃ yataḥ // (16.2) Par.?

naranārāyaṇo bhūtvā turye tepe tapo hariḥ / (17.1) Par.?

dharmasaṃrakṣaṇārthāya pūjitaḥ sa surāsuraiḥ // (17.2) Par.?

pañcamaḥ kapilo nāma siddheśaḥ kālaviplutam / (18.1) Par.?

provāca sūraye sāṃkhyaṃ tattvagrāmavinirṇayam // (18.2) Par.?

ṣaṣṭhamatrerapatyatvaṃ dattaḥ prāpto 'nasūyayā / (19.1) Par.?

ānvīkṣikīmalarkāya prahlādādibhya ūcivān // (19.2) Par.?

tataḥ sapta ākūtyāṃ ruceryajño 'bhyajāyata / (20.1) Par.?

sutrāmādyaiḥ suragaṇair yaṣṭvā svāyambhuvāntare // (20.2) Par.?

aṣṭame merudevyāṃ tu nābherjāta urukramaḥ / (21.1) Par.?

darśayanvartma nārīṇāṃ sarvāśramanamaskṛtam // (21.2) Par.?

ṛṣibhiryācito bheje navamaṃ pārthivaṃ vapuḥ / (22.1) Par.?

dugdhairmahauṣadhairviprāstena saṃjīvitāḥ prajāḥ // (22.2) Par.?

rūpaṃ sa jagṛhe mātsyaṃ cākṣuṣāntarasaṃplave / (23.1) Par.?

nāvyāropya mahīmayyāmapād vaivasvataṃ manum // (23.2) Par.?

surāsurāṇāmudadhiṃ mathnatāṃ mandarācalam / (24.1) Par.?

dadhre kamaṭharūpeṇa pṛṣṭha ekādaśe vibhuḥ // (24.2) Par.?

dhānvantaraṃ dvādaśamaṃ trayodaśamameva ca / (25.1) Par.?

āpyāyat surān anyān mohinyā mohayan striyā // (25.2) Par.?

caturdaśaṃ nārasiṃhaṃ caitya daityendramūrjitam / (26.1) Par.?

dadāra karajairugrairerakāṃ kaṭakudyathā // (26.2) Par.?

pañcadaśaṃ vāmanako bhūtvāgādadhvaraṃ baleḥ / (27.1) Par.?

pādatrayaṃ yācamānaḥ pratyāditsustriviṣṭapam // (27.2) Par.?

avatāre ṣoḍaśame paśyanbrahmadruho nṛpān / (28.1) Par.?

triḥ saptakṛtvaḥ kupito niḥkṣattrām akaronmahīm // (28.2) Par.?

tataḥ saptadaśe jātaḥ satyavatyāṃ parāśarāt / (29.1) Par.?

cakre vedataroḥ śākhāṃ dṛṣṭvā puṃso 'lpamedhasaḥ // (29.2) Par.?

naradevatvamāpannaḥ surakāryacikīrṣayā / (30.1) Par.?

samudranigrahādīni cakre kāryāṇyataḥ param // (30.2) Par.?

ekonaviṃśe viṃśatime vṛṣṇiṣu prāpya janmanī / (31.1) Par.?

rāmakṛṣṇāviti bhuvo bhagavānaharadbharam // (31.2) Par.?

tataḥ kalestu sandhyānte saṃmohāya suradviṣām / (32.1) Par.?

buddho nāmnā jinasutaḥ kīkaṭeṣu bhaviṣyati // (32.2) Par.?

atha so 'ṣṭamasandhyāyāṃ naṣṭaprāyeṣu rāñjasu / (33.1) Par.?

bhavitā viṣṇuyaśaso nāmnā kalkī jagatpatiḥ // (33.2) Par.?

avatārā hyasaṃkhyeyā hareḥ sattvanidherdvijāḥ / (34.1) Par.?

manuvedavido hyādyāḥ sarve viṣṇukalāḥ smṛtāḥ // (34.2) Par.?

tasmātsargādayo jātāḥ saṃpūjyāśca vratādinā / (35.1) Par.?

purāṇaṃ gāruḍaṃ vyāsaḥ purāsau me 'bravīdidam // (35.2) Par.?

iti śrīgāruḍe mahāpurāṇe pūrvakhaṇḍe prathamāṃśākhye karmakāṇḍe etatpurāṇapravṛttihetunirūpaṇaṃ nāma prathamo 'dhyāyaḥ // (36.1) Par.?