UD type:
UD sub-type:
Unclear, revisit later
Texts
Help
Select a text:
Bibliography Select a chapter:
(no revisions)
Show parallels Show headlines
Use dependency labeler
Chapter id: 3257
- Click on a sentence to show its analysis
- Keep the mouse pointer over a lemma to show its meanings.
tataḥ kumudaṣaṇḍābho nirmalaṃ nirmalaḥ svayam / (1.1)
Par.?
prajagāma nabhaścandro haṃso nīlam ivodakam // (1.2)
Par.?
sācivyam iva kurvan sa prabhayā nirmalaprabhaḥ / (2.1)
Par.?
candramā raśmibhiḥ śītaiḥ siṣeve pavanātmajam // (2.2)
Par.?
sa dadarśa tataḥ sītāṃ pūrṇacandranibhānanām / (3.1)
Par.?
śokabhārair iva nyastāṃ bhārair nāvam ivāmbhasi // (3.2)
Par.?
didṛkṣamāṇo vaidehīṃ hanūmānmārutātmajaḥ / (4.1)
Par.?
sa dadarśāvidūrasthā rākṣasīr ghoradarśanāḥ // (4.2)
Par.?
ekākṣīm ekakarṇāṃ ca karṇaprāvaraṇāṃ tathā / (5.1)
Par.?
akarṇāṃ śaṅkukarṇāṃ ca mastakocchvāsanāsikām // (5.2)
Par.?
atikāyottamāṅgīṃ ca tanudīrghaśirodharām / (6.1)
Par.?
dhvastakeśīṃ tathākeśīṃ keśakambaladhāriṇīm // (6.2)
Par.?
lambakarṇalalāṭāṃ ca lambodarapayodharām / (7.1)
Par.?
lambauṣṭhīṃ cibukauṣṭhīṃ ca lambāsyāṃ lambajānukām // (7.2)
Par.?
hrasvāṃ dīrghāṃ ca kubjāṃ ca vikaṭāṃ vāmanāṃ tathā / (8.1)
Par.?
karālāṃ bhugnavastrāṃ ca piṅgākṣīṃ vikṛtānanām // (8.2)
Par.?
vikṛtāḥ piṅgalāḥ kālīḥ krodhanāḥ kalahapriyāḥ / (9.1)
Par.?
kālāyasamahāśūlakūṭamudgaradhāriṇīḥ // (9.2)
Par.?
varāhamṛgaśārdūlamahiṣājaśivāmukhāḥ / (10.1)
Par.?
gajoṣṭrahayapādāśca nikhātaśiraso 'parāḥ // (10.2)
Par.?
ekahastaikapādāśca kharakarṇyaśvakarṇikāḥ / (11.1)
Par.?
gokarṇīr hastikarṇīśca harikarṇīstathāparāḥ // (11.2)
Par.?
anāsā atināsāśca tiryaṅnāsā vināsikāḥ / (12.1)
Par.?
gajasaṃnibhanāsāśca lalāṭocchvāsanāsikāḥ // (12.2)
Par.?
hastipādā mahāpādā gopādāḥ pādacūlikāḥ / (13.1)
Par.?
atimātraśirogrīvā atimātrakucodarīḥ // (13.2)
Par.?
atimātrāsyanetrāśca dīrghajihvānakhāstathā / (14.1)
Par.?
ajāmukhīr hastimukhīr gomukhīḥ sūkarīmukhīḥ // (14.2)
Par.?
hayoṣṭrakharavaktrāśca rākṣasīr ghoradarśanāḥ / (15.1)
Par.?
śūlamudgarahastāśca krodhanāḥ kalahapriyāḥ // (15.2)
Par.?
karālā dhūmrakeśīśca rākṣasīr vikṛtānanāḥ / (16.1)
Par.?
pibantīḥ satataṃ pānaṃ sadā māṃsasurāpriyāḥ // (16.2)
Par.?
māṃsaśoṇitadigdhāṅgīr māṃsaśoṇitabhojanāḥ / (17.1)
Par.?
tā dadarśa kapiśreṣṭho romaharṣaṇadarśanāḥ // (17.2)
Par.?
skandhavantam upāsīnāḥ parivārya vanaspatim / (18.1)
Par.?
tasyādhastācca tāṃ devīṃ rājaputrīm aninditām // (18.2)
Par.?
lakṣayāmāsa lakṣmīvān hanūmāñ janakātmajām / (19.1)
Par.?
niṣprabhāṃ śokasaṃtaptāṃ malasaṃkulamūrdhajām // (19.2)
Par.?
kṣīṇapuṇyāṃ cyutāṃ bhūmau tārāṃ nipatitām iva / (20.1)
Par.?
cāritryavyapadeśāḍhyāṃ bhartṛdarśanadurgatām // (20.2)
Par.?
bhūṣaṇair uttamair hīnāṃ bhartṛvātsalyabhūṣitām / (21.1)
Par.?
rākṣasādhipasaṃruddhāṃ bandhubhiśca vinākṛtām // (21.2)
Par.?
viyūthāṃ siṃhasaṃruddhāṃ baddhāṃ gajavadhūm iva / (22.1)
Par.?
candralekhāṃ payodānte śāradābhrair ivāvṛtām // (22.2)
Par.?
kliṣṭarūpām asaṃsparśād ayuktām iva vallakīm / (23.1)
Par.?
sītāṃ bhartṛhite yuktām ayuktāṃ rakṣasāṃ vaśe // (23.2)
Par.?
aśokavanikāmadhye śokasāgaram āplutām / (24.1)
Par.?
tābhiḥ parivṛtāṃ tatra sagrahām iva rohiṇīm // (24.2)
Par.?
dadarśa hanumān devīṃ latām akusumām iva / (25.1)
Par.?
sā malena ca digdhāṅgī vapuṣā cāpyalaṃkṛtā // (25.2)
Par.?
mṛṇālī paṅkadigdheva vibhāti ca na bhāti ca / (26.1)
Par.?
malinena tu vastreṇa parikliṣṭena bhāminīm // (26.2)
Par.?
saṃvṛtāṃ mṛgaśāvākṣīṃ dadarśa hanumān kapiḥ / (27.1)
Par.?
tāṃ devīṃ dīnavadanām adīnāṃ bhartṛtejasā // (27.2) Par.?
rakṣitāṃ svena śīlena sītām asitalocanām / (28.1)
Par.?
tāṃ dṛṣṭvā hanumān sītāṃ mṛgaśāvanibhekṣaṇām // (28.2)
Par.?
mṛgakanyām iva trastāṃ vīkṣamāṇāṃ samantataḥ / (29.1)
Par.?
dahantīm iva niḥśvāsair vṛkṣān pallavadhāriṇaḥ // (29.2)
Par.?
saṃghātam iva śokānāṃ duḥkhasyormim ivotthitām / (30.1)
Par.?
tāṃ kṣāmāṃ suvibhaktāṅgīṃ vinābharaṇaśobhinīm // (30.2)
Par.?
praharṣam atulaṃ lebhe mārutiḥ prekṣya maithilīm / (31.1)
Par.?
harṣajāni ca so 'śrūṇi tāṃ dṛṣṭvā madirekṣaṇām // (31.2)
Par.?
mumoca hanumāṃstatra namaścakre ca rāghavam / (32.1)
Par.?
namaskṛtvā ca rāmāya lakṣmaṇāya ca vīryavān // (32.2)
Par.?
sītādarśanasaṃhṛṣṭo hanūmān saṃvṛto 'bhavat // (33.1)
Par.?
Duration=0.12343215942383 secs.