UD type:
UD sub-type:
Unclear, revisit later
Texts
Help
Select a text:
Bibliography Select a chapter:
(no revisions)
Show parallels Show headlines
Use dependency labeler
Chapter id: 4568
- Click on a sentence to show its analysis
- Keep the mouse pointer over a lemma to show its meanings.
atha lokeśvarotsṛṣṭā tatra kālena kenacit / (1.1)
Par.?
nidrā samabhavat tīvrā kumbhakarṇasya rūpiṇī // (1.2)
Par.?
tato bhrātaram āsīnaṃ kumbhakarṇo 'bravīd vacaḥ / (2.1)
Par.?
nidrā māṃ bādhate rājan kārayasva mamālayam // (2.2) Par.?
viniyuktāstato rājñā śilpino viśvakarmavat / (3.1)
Par.?
akurvan kumbhakarṇasya kailāsasamam ālayam // (3.2)
Par.?
vistīrṇaṃ yojanaṃ śubhraṃ tato dviguṇam āyatam / (4.1)
Par.?
darśanīyaṃ nirābādhaṃ kumbhakarṇasya cakrire // (4.2)
Par.?
sphāṭikaiḥ kāñcanaiścitraiḥ stambhaiḥ sarvatra śobhitam / (5.1)
Par.?
vaidūryakṛtaśobhaṃ ca kiṅkiṇījālakaṃ tathā // (5.2)
Par.?
dantatoraṇavinyastaṃ vajrasphaṭikavedikam / (6.1)
Par.?
sarvartusukhadaṃ nityaṃ meroḥ puṇyāṃ guhām iva // (6.2)
Par.?
tatra nidrāṃ samāviṣṭaḥ kumbhakarṇo niśācaraḥ / (7.1)
Par.?
bahūnyabdasahasrāṇi śayāno nāvabudhyate // (7.2)
Par.?
nidrābhibhūte tu tadā kumbhakarṇe daśānanaḥ / (8.1)
Par.?
devarṣiyakṣagandharvān bādhate sma sa nityaśaḥ // (8.2)
Par.?
udyānāni vicitrāṇi nandanādīni yāni ca / (9.1)
Par.?
tāni gatvā susaṃkruddho bhinatti sma daśānanaḥ // (9.2)
Par.?
nadīṃ gaja iva krīḍan vṛkṣān vāyur iva kṣipan / (10.1)
Par.?
nagān vajra iva sṛṣṭo vidhvaṃsayati nityaśaḥ // (10.2)
Par.?
tathāvṛttaṃ tu vijñāya daśagrīvaṃ dhaneśvaraḥ / (11.1)
Par.?
kulānurūpaṃ dharmajño vṛttaṃ saṃsmṛtya cātmanaḥ // (11.2)
Par.?
saubhrātradarśanārthaṃ tu dūtaṃ vaiśravaṇastadā / (12.1)
Par.?
laṅkāṃ saṃpreṣayāmāsa daśagrīvasya vai hitam // (12.2)
Par.?
sa gatvā nagarīṃ laṅkām āsasāda vibhīṣaṇam / (13.1)
Par.?
mānitastena dharmeṇa pṛṣṭaścāgamanaṃ prati // (13.2)
Par.?
pṛṣṭvā ca kuśalaṃ rājño jñātīn api ca bāndhavān / (14.1)
Par.?
sabhāyāṃ darśayāmāsa tam āsīnaṃ daśānanam // (14.2)
Par.?
sa dṛṣṭvā tatra rājānaṃ dīpyamānaṃ svatejasā / (15.1)
Par.?
jayena cābhisaṃpūjya tūṣṇīm āsīnmuhūrtakam // (15.2)
Par.?
tasyopanīte paryaṅke varāstaraṇasaṃvṛte / (16.1)
Par.?
upaviśya daśagrīvaṃ dūto vākyam athābravīt // (16.2)
Par.?
rājan vadāmi te sarvaṃ bhrātā tava yad abravīt / (17.1)
Par.?
ubhayoḥ sadṛśaṃ saumya vṛttasya ca kulasya ca // (17.2)
Par.?
sādhu paryāptam etāvat kṛtaścāritrasaṃgrahaḥ / (18.1)
Par.?
sādhu dharme vyavasthānaṃ kriyatāṃ yadi śakyate // (18.2)
Par.?
dṛṣṭaṃ me nandanaṃ bhagnam ṛṣayo nihatāḥ śrutāḥ / (19.1)
Par.?
devānāṃ tu samudyogastvatto rājañ śrutaśca me // (19.2)
Par.?
nirākṛtaśca bahuśastvayāhaṃ rākṣasādhipa / (20.1)
Par.?
aparāddhā hi bālyācca rakṣaṇīyāḥ svabāndhavāḥ // (20.2)
Par.?
ahaṃ tu himavatpṛṣṭhaṃ gato dharmam upāsitum / (21.1)
Par.?
raudraṃ vrataṃ samāsthāya niyato niyatendriyaḥ // (21.2)
Par.?
tatra devo mayā dṛṣṭaḥ saha devyomayā prabhuḥ / (22.1)
Par.?
savyaṃ cakṣur mayā caiva tatra devyāṃ nipātitam // (22.2)
Par.?
kā nviyaṃ syād iti śubhā na khalvanyena hetunā / (23.1)
Par.?
rūpaṃ hyanupamaṃ kṛtvā tatra krīḍati pārvatī // (23.2)
Par.?
tato devyāḥ prabhāvena dagdhaṃ savyaṃ mamekṣaṇam / (24.1)
Par.?
reṇudhvastam iva jyotiḥ piṅgalatvam upāgatam // (24.2)
Par.?
tato 'ham anyad vistīrṇaṃ gatvā tasya girestaṭam / (25.1)
Par.?
pūrṇaṃ varṣaśatānyaṣṭau samavāpa mahāvratam // (25.2)
Par.?
samāpte niyame tasmiṃstatra devo maheśvaraḥ / (26.1)
Par.?
prītaḥ prītena manasā prāha vākyam idaṃ prabhuḥ // (26.2)
Par.?
prīto 'smi tava dharmajña tapasānena suvrata / (27.1)
Par.?
mayā caitad vrataṃ cīrṇaṃ tvayā caiva dhanādhipa // (27.2)
Par.?
tṛtīyaḥ puruṣo nāsti yaścared vratam īdṛśam / (28.1)
Par.?
vrataṃ suduścaraṃ hyetanmayaivotpāditaṃ purā // (28.2)
Par.?
tat sakhitvaṃ mayā sārdhaṃ rocayasva dhaneśvara / (29.1)
Par.?
tapasā nirjitatvāddhi sakhā bhava mamānagha // (29.2)
Par.?
devyā dagdhaṃ prabhāvena yacca savyaṃ tavekṣaṇam / (30.1)
Par.?
ekākṣipiṅgaletyeva nāma sthāsyati śāśvatam // (30.2)
Par.?
evaṃ tena sakhitvaṃ ca prāpyānujñāṃ ca śaṃkarāt / (31.1)
Par.?
āgamya ca śruto 'yaṃ me tava pāpaviniścayaḥ // (31.2)
Par.?
tadadharmiṣṭhasaṃyogānnivarta kuladūṣaṇa / (32.1)
Par.?
cintyate hi vadhopāyaḥ sarṣisaṃghaiḥ suraistava // (32.2)
Par.?
evam ukto daśagrīvaḥ kruddhaḥ saṃraktalocanaḥ / (33.1)
Par.?
hastān dantāṃśca saṃpīḍya vākyam etad uvāca ha // (33.2)
Par.?
vijñātaṃ te mayā dūta vākyaṃ yat tvaṃ prabhāṣase / (34.1)
Par.?
naiva tvam asi naivāsau bhrātrā yenāsi preṣitaḥ // (34.2)
Par.?
hitaṃ na sa mamaitaddhi bravīti dhanarakṣakaḥ / (35.1)
Par.?
maheśvarasakhitvaṃ tu mūḍha śrāvayase kila // (35.2)
Par.?
na hantavyo gurur jyeṣṭho mamāyam iti manyate / (36.1)
Par.?
tasya tvidānīṃ śrutvā me vākyam eṣā kṛtā matiḥ // (36.2)
Par.?
trīṃllokān api jeṣyāmi bāhuvīryam upāśritaḥ / (37.1)
Par.?
etanmuhūrtam eṣo 'haṃ tasyaikasya kṛte ca vai / (37.2)
Par.?
caturo lokapālāṃstānnayiṣyāmi yamakṣayam // (37.3)
Par.?
evam uktvā tu laṅkeśo dūtaṃ khaḍgena jaghnivān / (38.1)
Par.?
dadau bhakṣayituṃ hyenaṃ rākṣasānāṃ durātmanām // (38.2)
Par.?
tataḥ kṛtasvastyayano ratham āruhya rāvaṇaḥ / (39.1)
Par.?
trailokyavijayākāṅkṣī yayau yatra dhaneśvaraḥ // (39.2)
Par.?
Duration=0.1544349193573 secs.