Texts

evamādisarge prakṛter mahadādisargaṃ darśayitvā mahāpralaye prakṛtāvavyaktarūpāyāṃ buddhyādīnāṃ layamāha puruṣa ityādi // (1) Par.?

iṣṭair bhāvairiti puruṣopabhogārthamiṣṭair buddhyādibhiḥ // (2) Par.?

anye tu evaṃbhūtasaṅgaṃ janmani buddhyādiviyogaṃ ca maraṇe bruvate // (3) Par.?

tanna janmamaraṇayor buddhyādīnāṃ vidyamānatvāt // (4) Par.?

uktaṃ hi atīndriyaistair atisūkṣmarūpair ātmā kadācinna vimuktapūrvaḥ / (5.1) Par.?

naivendriyair naiva manomatibhyāṃ na cāpyahaṅkāravikāradoṣaiḥ iti // (5.2) Par.?

tathānyatrāpyuktaṃ pūrvotpannam asaktaṃ niyataṃ mahadādisūkṣmaparyantam / (6.1) Par.?

saṃsarati nirupabhogaṃ bhāvairadhivāsitaṃ liṅgam iti // (6.2) Par.?

tasmānmahāpralaya eva prakṛtau layaḥ tathādisarga eva prakṛtermahadādisṛṣṭiriti // (7) Par.?

etadeva prapañcaṃ layaṃ ca prakṛterāha avyaktād ityādi // (8) Par.?

avyaktāditi prakṛteḥ vyaktatāmiti mahadādimahābhūtaparyantaprapañcarūpatāṃ yāti // (9) Par.?

avyaktād iti mahābhūtaprapañcādyavasthātaḥ punaravyaktarūpatāṃ yāti gacchati mahāpralaye hi mahābhūtāni tanmātreṣu layaṃ yānti tanmātrāṇi tathendriyāṇi cāhaṅkāre layaṃ yānti ahaṅkāro buddhau buddhiśca prakṛtāviti layakramaḥ // (10) Par.?

ayaṃ ca layakramo mokṣe'pi bhavati // (11) Par.?

paraṃ tu tatra taṃ puruṣaṃ prati punaḥ sargaṃ nārabhate prakṛtiḥ // (12) Par.?

ayaṃ saṃsāraḥ kuto bhavatītyāha raja ityādi // (13) Par.?

āviṣṭo yuktaḥ // (14) Par.?

cakravat parivartata iti punaḥ punar layasargābhyāṃ yujyate // (15) Par.?

dvandva iti rajastamorūpe mithune // (16) Par.?

ahaṃkāraparā iti ahaṃkārānmamedam ityādimithyājñānaparāḥ // (17) Par.?

udayapralayau janmamaraṇe kiṃvā layasargau // (18) Par.?

ato'nyatheti ye rāgadveṣavimuktā nirahaṃkārāśca teṣāṃ nodayapralayau bhavataḥ // (19) Par.?