Texts

navapravālodgamasasyaramyaḥ praphullalodhraḥ paripakvaśāliḥ / (1.1) Par.?

vilīnapadmaḥ prapatattuṣāro hemantakālaḥ samupāgato'yam // (1.2) Par.?

manoharaiś candanarāgagaurais tuṣārakundendunibhaiś ca hāraiḥ / (2.1) Par.?

vilāsinīnāṃ stanaśālinīnāṃ nālaṃkriyante stanamaṇḍalāni // (2.2) Par.?

na bāhuyugmeṣu vilāsinīnāṃ prayānti saṅgaṃ valayāṅgadāni / (3.1) Par.?

nitambabimbeṣu navaṃ dukūlaṃ tanvaṃśukaṃ pīnapayodhareṣu // (3.2) Par.?

kāñcīguṇaiḥ kāñcanaratnacitrair no bhūṣayanti pramadā nitambān / (4.1) Par.?

na nūpurairhaṃsarutaṃ bhajadbhiḥ pādāmbujāny ambujakāntibhāñji // (4.2) Par.?

gātrāṇi kālīyakacarcitāni sapattralekhāni mukhāmbujāni / (5.1) Par.?

śirāṃsi kālāgurudhūpitāni kurvanti nāryaḥ suratotsavāya // (5.2) Par.?

ratiśramakṣāmavipāṇḍuvaktrāḥ samprāptaharṣābhyudayās taruṇyaḥ / (6.1) Par.?

hasanti noccair daśanāgrabhinnān prapīḍyamānān adharān avekṣya // (6.2) Par.?

pīnastanoraḥsthalabhāgaśobhām āsādya tatpīḍanajātakhedaḥ / (7.1) Par.?

tṛṇāgralagnaistuhinaiḥ patadbhir ākrandatīvoṣasi śītakālaḥ // (7.2) Par.?

prabhūtaśāliprasavaiścitāni mṛgāṅganāyūthavibhūṣitāni / (8.1) Par.?

manoharakrauñcanināditāni sīmāntarāṇy utsukayanti cetaḥ // (8.2) Par.?

praphullanīlotpalaśobhitāni sonmādakādambavibhūṣitāni / (9.1) Par.?

prasannatoyāni suśītalāni sarāṃsi cetāṃsi haranti puṃsām // (9.2) Par.?

mārgaṃ samīkṣyātinirastanīraṃ pravāsakhinnaṃ patimudvahantyaḥ / (10.1) Par.?

avekṣyamāṇā hariṇekṣaṇākṣyaḥ prabodhayantīva manorathāni // (10.2) Par.?

pākaṃ vrajantī himajātaśītair ādhūyamānā satataṃ marudbhiḥ / (11.1) Par.?

priye priyaṅguḥ priyaviprayuktā vipāṇḍutāṃ yāti vilāsinīva // (11.2) Par.?

puṣpāsavāmodasugandhivaktro niḥśvāsavātaiḥ surabhīkṛtāṅgaḥ / (12.1) Par.?

parasparāṅgavyatiṣaṅgaśāyī śete janaḥ kāmarasānuviddhaḥ // (12.2) Par.?

dantacchadaiḥ savraṇadantacihnaiḥ stanaiśca pāṇyagrakṛtābhilekhaiḥ / (13.1) Par.?

saṃsūcyate nirdayamaṅganānāṃ ratopabhogo navayauvanānām // (13.2) Par.?

kācidvibhūṣayati darpaṇasaktahastā bālātapeṣu vanitā vadanāravindam / (14.1) Par.?

dantacchadaṃ priyatamena nipītasāraṃ dantāgrabhinnam avakṛṣya nirīkṣate ca // (14.2) Par.?

anyā prakāmasurataśramakhinnadehā rātriprajāgaravipāṭalanetrapadmā / (15.1) Par.?

srastāṃsadeśalalitākulakeśapāśā nidrāṃ prayāti mṛdusūryakarābhitaptā // (15.2) Par.?

nirmālyadāma paribhuktamanojñagandhaṃ mūrdhno 'panīya ghananīlaśiroruhāntāḥ / (16.1) Par.?

pīnonnatastanabharānatagātrayaṣṭyaḥ kurvanti keśaracanāmaparāstaruṇyaḥ // (16.2) Par.?

anyā priyeṇa paribhuktamavekṣya gātraṃ harṣānvitā viracitādharacāruśobhā / (17.1) Par.?

kūrpāsakaṃ paridadhāti nakhakṣatāṅgī vyālambinīlalalitālakakuñcitākṣī // (17.2) Par.?

anyāściraṃ suratakelipariśrameṇa khedaṃ gatāḥ praśithilīkṛtagātrayaṣṭyaḥ / (18.1) Par.?

saṃhṛṣyamāṇapulakorupayodharāntā abhyañjanaṃ vidadhati pramadāḥ suśobhāḥ // (18.2) Par.?

bahuguṇaramaṇīyo yoṣitāṃ cittahārī pariṇatabahuśālivyākulagrāmasīmā / (19.1) Par.?

vinipatitatuṣāraḥ krauñcanādopagītaḥ pradiśatu himayuktaḥ kāla eṣaḥ sukhaṃ vaḥ // (19.2) Par.?