Texts

śrīmārkaṇḍeya uvāca / (1.1) Par.?

tato gacchetparaṃ tīrthaṃ saṅgameśvaramuttamam / (1.2) Par.?

narmadādakṣiṇe kūle sarvapāpabhayāpaham // (1.3) Par.?

dhanadastatra viśrānto muhūrtaṃ nṛpasattama / (2.1) Par.?

pitṛlokātsamāyātaḥ kailāsaṃ dharaṇīdharam // (2.2) Par.?

pratyayārthaṃ nṛpaśreṣṭha hyadyāpi dharaṇītale / (3.1) Par.?

kṛṣṇavarṇā hi pāṣāṇā dṛśyante sphaṭikojjvalāḥ // (3.2) Par.?

vindhyanirjharaniṣkrāntā puṇyatoyā saridvarā / (4.1) Par.?

praviṣṭā narmadātoye sarvapāpapraṇāśane // (4.2) Par.?

saṅgame tatra yaḥ snātvā pūjayet saṅgameśvaram / (5.1) Par.?

aśvamedhasya yajñasya phalaṃ prāpnoty asaṃśayam // (5.2) Par.?

ghaṇṭāpatākāvitanaṃ yo dadetsaṅgameśvare / (6.1) Par.?

haṃsayuktavimānastho divyastrīśatasaṃvṛtaḥ // (6.2) Par.?

sa rudrapadamāpnoti rudrasyānucaro bhavet / (7.1) Par.?

dadhi bhakte na devasya yaḥ kuryālliṅgapūraṇam // (7.2) Par.?

sikthasaṃkhyaṃ śive loke sa vaset kālam īpsitam / (8.1) Par.?

śrīphalaiḥ pūrayelliṅgaṃ niḥsvo bhūtvā bhavasya tu // (8.2) Par.?

so 'pi tatphalamāpnoti gataḥ svarge nareśvara / (9.1) Par.?

akṣayā santatistasya jāyate saptajanmasu // (9.2) Par.?

snapanaṃ devadevasya dadhnā madhughṛtena vā / (10.1) Par.?

yaḥ karoti vidhānena tasya puṇyaphalaṃ śṛṇu // (10.2) Par.?

dhṛtakṣīravahā nadyo yatra vṛkṣā madhusravāḥ / (11.1) Par.?

tatra te mānavā yānti suprasanne maheśvare // (11.2) Par.?

patraṃ puṣpaṃ phalaṃ toyaṃ yastu dadyānmaheśvare / (12.1) Par.?

tatsarvaṃ saptajanmāni hyakṣayaṃ phalam aśnute // (12.2) Par.?

sarveṣāmeva pātrāṇāṃ mahāpātraṃ maheśvaraḥ / (13.1) Par.?

tasmāt sarvaprayatnena pūjanīyo maheśvaraḥ // (13.2) Par.?

brahmacaryasthito nityaṃ yastu pūjayate śivam / (14.1) Par.?

iha jīvansa deveśo mṛto gacched anāmayam // (14.2) Par.?

śive tu pūjite pārtha yatphalaṃ prāpyate budhaiḥ / (15.1) Par.?

yogīndre caiva tatpārtha pūjite labhate phalam // (15.2) Par.?

te dhanyāste mahātmānas teṣāṃ janma sujīvitam / (16.1) Par.?

yeṣāṃ gṛheṣu bhuñjanti śivabhaktiratā narāḥ // (16.2) Par.?

saṃnirudhyendriyagrāmaṃ yatrayatra vasenmuniḥ / (17.1) Par.?

tatra tatra kurukṣetraṃ naimiṣaṃ puṣkarāṇi ca // (17.2) Par.?

yatphalaṃ vedaviduṣi bhojite śatasaṃkhyayā / (18.1) Par.?

tatphalaṃ jāyate pārtha hyekena śivayoginā // (18.2) Par.?

yatra bhuñjati bhasmāṅgī mūrkho vā yadi paṇḍitaḥ / (19.1) Par.?

tatra bhuñjati deveśaḥ sapatnīko vṛṣadhvajaḥ // (19.2) Par.?

viprāṇāṃ vedaviduṣāṃ koṭiṃ saṃbhojya yatphalam / (20.1) Par.?

bhikṣāmātrapradānena tatphalaṃ śivayoginām // (20.2) Par.?

saṅgameśvaramāsādya prāṇatyāgaṃ karoti yaḥ / (21.1) Par.?

na tasya punarāvṛttiḥ śivalokāt kadācana // (21.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe saṅgameśvaratīrthamāhātmyavarṇanaṃ nāmāṣṭapañcāśadadhikaśatatamo 'dhyāyaḥ // (22.1) Par.?