Texts

athānādimalāpetaḥ sarvakṛt sarvavicchivaḥ / (1.1) Par.?

pūrvavyatyāsitasyāṇoḥ pāśajālam apohati // (1.2) Par.?

tripadārthaṃ catuṣpādaṃ mahātantraṃ jagatpatiḥ / (2.1) Par.?

sūtreṇaikena saṃhṛtya prāha vistaraśaḥ punaḥ // (2.2) Par.?

jagajjanmasthitidhvaṃsatirobhāvavimuktayaḥ / (3.1) Par.?

kṛtyaṃ sakārakaphalaṃ jñeyam asyaitad eva hi // (3.2) Par.?

tena svabhāvasiddhena bhavitavyaṃ jagatkṛtā / (4.1) Par.?

arvāksiddhe 'navasthā syān mokṣo nirhetuko 'pi vā // (4.2) Par.?

caitanyaṃ dṛkkriyārūpaṃ tad asty ātmani sarvadā / (5.1) Par.?

sarvataś ca yato muktau śrūyate sarvatomukham // (5.2) Par.?

sad apy abhāsamānatvāt tan niruddhaṃ pratīyate / (6.1) Par.?

vaśyo 'nāvṛtavīryasya so 'ta evāvimokṣaṇāt // (6.2) Par.?

prāvṛtīśabale karma māyākāryaṃ caturvidham / (7.1) Par.?

pāśajālaṃ samāsena dharmā nāmnaiva kīrtitāḥ // (7.2) Par.?

iti vastutrayasyāsya prākpādakṛtasaṃsthiteḥ / (8.1) Par.?

caryāyogakriyāpādair viniyogo 'bhidhāsyate // (8.2) Par.?

viniyogaphalaṃ muktir bhuktir apy anuṣaṅgataḥ / (9.1) Par.?

parāparavibhāgena bhidyete te tv anekadhā // (9.2) Par.?

vedāntasāṃkhyasadasatpādārthikamatādiṣu / (10.1) Par.?

sasādhanā muktir asti ko viśeṣaḥ śivāgame // (10.2) Par.?

praṇetrasarvadarśitvān na sphuṭo vastusaṃgrahaḥ / (11.1) Par.?

upāyāḥ saphalās tadvac chaive sarvam idaṃ param // (11.2) Par.?

vedānteṣv eka evātmā cidacidvyaktilakṣitaḥ / (12.1) Par.?

pratijñāmātram evedaṃ niścayaḥ kiṃnibandhanaḥ // (12.2) Par.?

atha pramāṇaṃ tatrātmā prameyatvaṃ prapadyate / (13.1) Par.?

yatraitad ubhayaṃ tatra catuṣṭayam api sthitam // (13.2) Par.?

advaitahānir evaṃ syān niṣpramāṇakatānyathā / (14.1) Par.?

bhogasāmyāvimokṣau ca yau neṣṭāv ātmavādibhiḥ // (14.2) Par.?

sāṃkhyajñāne 'pi mithyātvaṃ kārye kāraṇabuddhitaḥ / (15.1) Par.?

akartṛbhāvād bhoktuś ca svātantryād apy acittvataḥ // (15.2) Par.?

iha sapta padārthāḥ syur jīvājīvāsravās trayaḥ / (16.1) Par.?

saṃvaro nirjaraś caiva bandhamokṣāv ubhāv api // (16.2) Par.?

syādvādalāñchitāś caite sarve 'naikāntikatvataḥ / (17.1) Par.?

tad eva sat tadevāsad iti kena pramīyate // (17.2) Par.?

sad anyad asad anyac ca tad evaṃ siddhasādhyatā / (18.1) Par.?

asaj jaghanyaṃ sac chreṣṭham ity api bruvate budhāḥ // (18.2) Par.?

naikatra tadapekṣātaḥ sthitam evobhayaṃ tataḥ / (19.1) Par.?

atha cet tadasadbhāve sadayuktataro yataḥ // (19.2) Par.?

tattkarmasaṃkarabhayād avyāpitvaṃ ca te jaguḥ / (20.1) Par.?

sāmānyetarasaṃbandhajñānābhāvād acetasaḥ // (20.2) Par.?

yaḥ prāg avyāpakaḥ so 'nte kathamanyādṛśo bhavet / (21.1) Par.?

sa vikāsādidharmā cet tato doṣaparamparā // (21.2) Par.?

ṣaṭpadārthaparijñānān mithyājñānaṃ nivartate / (22.1) Par.?

rāgadveṣau mamatvaṃ ca tadviśeṣaguṇās tataḥ // (22.2) Par.?

kramaśo vinivartante dehasaṃyogajā yataḥ / (23.1) Par.?

sā muktir jaḍatārūpā tato muktaḥ śavo na kim // (23.2) Par.?

cidvyañjakasya karmādeḥ kṣaṇikatvān muhurmuhuḥ / (24.1) Par.?

vyajyate jāyamānaiva kṣaṇiketi matā paraiḥ // (24.2) Par.?

tadasatkarmaṇo bhogād atītānubhavasmṛteḥ / (25.1) Par.?

sthitir niranvaye nāśe na smṛter nāpi karmaṇaḥ // (25.2) Par.?

vināśalakṣaṇo 'paiti na muktāv apy upaplavaḥ / (26.1) Par.?

na cāsty anubhavaḥ kaścid bhavāvasthā varaṃ tataḥ // (26.2) Par.?

ityādy ajñānamūḍhānāṃ matam āśritya durdhiyaḥ / (27.1) Par.?

apavargam abhīpsanti khadyotāt pāvakārthinaḥ // (27.2) Par.?

yat kaivalyaṃ puṃsprakṛtyor vivekād yo vā sarvaṃ brahma matvā virāmaḥ / (28.1) Par.?

yā vā kāścin muktayaḥ pāśajanyās tās tāḥ sarvā bhedam āyānti sṛṣṭau // (28.2) Par.?

śaive siddho bhāti mūrdhnītareṣāṃ muktaḥ sṛṣṭau punar abhyeti nādhaḥ / (29.1) Par.?

viśvān arthān svena viṣṭabhya dhāmnā sarveśānānīśitaḥ sarvadāste // (29.2) Par.?