Texts

tataḥ smarasakhe kāle puṣpayukte niśākare / (1.1) Par.?

divākare mṛdukare devī putraṃ vyajāyata // (1.2) Par.?

putrajanma narendrasya jagataḥ sukhajanma ca / (2.1) Par.?

śaṅkājanma ca śatrūṇāṃ samaṃ samabhavat trayam // (2.2) Par.?

atha sambhūya gaṇakair uktaṃ gaṇitajātakaiḥ / (3.1) Par.?

cakravartipitā lokāv ubhau vijayatām iti // (3.2) Par.?

tataḥ sacivabhāryāṇāṃ tasminn eva dine sutāḥ / (4.1) Par.?

alpakālāntare jātāḥ kanīyāṃso nṛpātmajāt // (4.2) Par.?

kim utsavaḥ kiṃ vyasanaṃ kiṃ prāṇāḥ prāṇayantu kim / (5.1) Par.?

āgataṃ cedivatsānām iti nāsīd viniścayaḥ // (5.2) Par.?

jātakarmaṇi nirvṛtte prāpte ca dvādaśe 'hani / (6.1) Par.?

anvarthanāmnas tanayān akurvan rājamantriṇaḥ // (6.2) Par.?

vāhanena nareṇaiva kubero naravāhanaḥ / (7.1) Par.?

naravāhanadatto 'stu dattas tena yatas tataḥ // (7.2) Par.?

iti nāma kṛtaṃ rājñā putrasya sapurodhasā / (8.1) Par.?

bhūmihemagajāśvādidānaprītadvijanmanā // (8.2) Par.?

nāmnā hariśikhaṃ cakre rumaṇvān ātmajaṃ yataḥ / (9.1) Par.?

tasmai vitīrṇavān svapne devadevaḥ śaraṃ hariḥ // (9.2) Par.?

yaugandharāyaṇaḥ putraṃ cakāra marubhūtikam / (10.1) Par.?

saṃnāhachadmanā tasmai yatas taṃ maruto daduḥ // (10.2) Par.?

cakāra gomukhaṃ putram ṛṣabhaḥ saṃjñayā yataḥ / (11.1) Par.?

svayaṃ gobhiḥ prasannābhiś citraṃ tasmai pradarśitam // (11.2) Par.?

putraṃ tapantakaṃ nāmnā karoti sma vasantakaḥ / (12.1) Par.?

yasmāt taṃ tapanas tasmai kuṇḍalachadmanā dadau // (12.2) Par.?

evaṃ labdhaś ca jātaś ca yaḥ kṛtaṃ nāma yasya ca / (13.1) Par.?

aham eva sa te caite sarve hariśikhādayaḥ // (13.2) Par.?

te vayaṃ tu yathākālaṃ kṛtānnaprāśanādayaḥ / (14.1) Par.?

avardhāmahi laghv eva sanāthāḥ pādapā iva // (14.2) Par.?

tataḥ kumāravaṭakām upādhyāyair adhiṣṭhitām / (15.1) Par.?

sabrahmacaryakaiś chāttrair dhātrībhiś cāśrayāmahi // (15.2) Par.?

avratair eva cāsmābhir abhyastāḥ sakalāḥ kalāḥ / (16.1) Par.?

savratais tu catasro 'pi vidyāḥ sarvaṃ ca vāṅmayam // (16.2) Par.?

gacchatsu divaseṣv evam ekadā marubhūtikaḥ / (17.1) Par.?

bālabhāvād anadhyāye krīḍati sma sakandukaḥ // (17.2) Par.?

taṃ tu bālasvabhāvena tasmād ācchidya kandukam / (18.1) Par.?

ahaṃ javena mahatā prayātaḥ pitur antikam // (18.2) Par.?

athānubadhnan māṃ vegāt paṭuśvasitasaṃtatiḥ / (19.1) Par.?

baddhamuṣṭikaraḥ krodhād āgato marubhūtikaḥ // (19.2) Par.?

kiṃ kiṃ tāteti tātena sa pṛṣṭa idam uktavān / (20.1) Par.?

kanduko me hṛto 'nena tam ayaṃ dāpyatām iti // (20.2) Par.?

tato rājñā pariṣvajya dāpitāparakandukaḥ / (21.1) Par.?

tarjanītarjitaḥ pitrā kumāravaṭakāṃ gataḥ // (21.2) Par.?

aham apy aṅkam āropya tātena paribhāṣitaḥ / (22.1) Par.?

mā sma tāta punar bhrātṝn kopayeḥ kopanān iti // (22.2) Par.?

tathāpi pratiṣiddho 'haṃ keliśīlatayā śiśoḥ / (23.1) Par.?

yathainān kopayāmi sma tathaite mām akopayan // (23.2) Par.?

abhyāsam ekadā kurvan nārācaṃ marubhūtikaḥ / (24.1) Par.?

icchati sma ca visraṣṭuṃ mayā ca calitaṃ dhanuḥ // (24.2) Par.?

asāv api ca nārācaś calitāc cāpataś cyutaḥ / (25.1) Par.?

mālatīmukulaṃ lakṣaṃ tan mātreṇaiva nāspṛśat // (25.2) Par.?

utsṛjya kupitaś cāpaṃ dhāvamānaḥ sa mām anu / (26.1) Par.?

āsthānasthamahīpālasamīpam agamat tataḥ // (26.2) Par.?

yaugandharāyaṇo dṛṣṭvā kupitaṃ marubhūtikam / (27.1) Par.?

kupito bhartsayitvedam abhāṣata mahīpatim // (27.2) Par.?

veditā sarvavidyānām āsannanavayauvanaḥ / (28.1) Par.?

rājaputro mahārāja yauvarājye 'bhiṣicyatām // (28.2) Par.?

yāvad yāvaddhi śāstrajñāḥ śāstrārthān na prayuñjate / (29.1) Par.?

tāvat tāvad bhavanty eṣāṃ kuṇṭhāḥ kāryeṣu buddhayaḥ // (29.2) Par.?

amī rumaṇvadādīnāṃ putrā hariśikhādayaḥ / (30.1) Par.?

vijānanto 'pi śāstrāṇi sutarām andhabuddhayaḥ // (30.2) Par.?

vastuny alpe 'py anātmajñāḥ saṃrabdhālohitānanāḥ / (31.1) Par.?

prabhum eva jighāṃsanti mṛgendraṃ markaṭā iva // (31.2) Par.?

tad ete 'pi niyojyantām adhikāreṣu keṣucit / (32.1) Par.?

vijñāpanā madīyeyaṃ saphalīkriyatām iti // (32.2) Par.?

yaugandharāyaṇavacaḥ subhagaṃ niśamya prītyā narendrasabham ucchrayitāgrahastam / (33.1) Par.?

bhoḥ sādhu sādhu narakuñjara sādhu mantrin ity ujjhitāsanam abhāṣata nirvyavastham // (33.2) Par.?