Texts
Select a text:
Bibliography
Bibliography
Select a chapter:
(no revisions)
Show parallels Show headlines
Use dependency labeler
(no revisions)
Associated topic(s): Sarasvatī, Vāc, speech
Show parallels Show headlines
Use dependency labeler
Chapter id: 10773
- Click on a sentence to show its analysis
- Keep the mouse pointer over a lemma to show its meanings.
iyam adadād rabhasam ṛṇacyutaṃ divodāsaṃ vadhryaśvāya dāśuṣe / (1.1) Par.?
yā śaśvantam ācakhādāvasam paṇiṃ tā te dātrāṇi taviṣā sarasvati // (1.2) Par.?
iyaṃ śuṣmebhir bisakhā ivārujat sānu girīṇāṃ taviṣebhir ūrmibhiḥ / (2.1) Par.?
pārāvataghnīm avase suvṛktibhiḥ sarasvatīm ā vivāsema dhītibhiḥ // (2.2) Par.?
sarasvati devanido ni barhaya prajāṃ viśvasya bṛsayasya māyinaḥ / (3.1) Par.?
uta kṣitibhyo 'vanīr avindo viṣam ebhyo asravo vājinīvati // (3.2) Par.?
pra ṇo devī sarasvatī vājebhir vājinīvatī / (4.1) Par.?
dhīnām avitry avatu // (4.2) Par.?
yas tvā devi sarasvaty upabrūte dhane hite / (5.1) Par.?
indraṃ na vṛtratūrye // (5.2) Par.?
tvaṃ devi sarasvaty avā vājeṣu vājini / (6.1) Par.?
radā pūṣeva naḥ sanim // (6.2) Par.?
uta syā naḥ sarasvatī ghorā hiraṇyavartaniḥ / (7.1) Par.?
vṛtraghnī vaṣṭi suṣṭutim // (7.2) Par.?
yasyā ananto ahrutas tveṣaś cariṣṇur arṇavaḥ / (8.1) Par.?
amaś carati roruvat // (8.2) Par.?
sā no viśvā ati dviṣaḥ svasṝr anyā ṛtāvarī / (9.1) Par.?
atann aheva sūryaḥ // (9.2) Par.?
uta naḥ priyā priyāsu saptasvasā sujuṣṭā / (10.1) Par.?
sarasvatī stomyā bhūt // (10.2) Par.?
āpapruṣī pārthivāny uru rajo antarikṣam / (11.1) Par.?
sarasvatī nidas pātu // (11.2) Par.?
triṣadhasthā saptadhātuḥ pañca jātā vardhayantī / (12.1) Par.?
vāje vāje havyā bhūt // (12.2) Par.?
pra yā mahimnā mahināsu cekite dyumnebhir anyā apasām apastamā / (13.1) Par.?
ratha iva bṛhatī vibhvane kṛtopastutyā cikituṣā sarasvatī // (13.2) Par.?
sarasvaty abhi no neṣi vasyo māpa spharīḥ payasā mā na ā dhak / (14.1) Par.?
juṣasva naḥ sakhyā veśyā ca mā tvat kṣetrāṇy araṇāni ganma // (14.2) Par.?
Duration=0.071553945541382 secs.