Texts
Select a text:
Bibliography
Bibliography
Select a chapter:
(no revisions)
Show parallels Show headlines
Use dependency labeler
(no revisions)
Associated topic(s): Viśve devāḥ
Show parallels Show headlines
Use dependency labeler
Chapter id: 9809
- Click on a sentence to show its analysis
- Keep the mouse pointer over a lemma to show its meanings.
abudhram u tya indravanto agnayo jyotir bharanta uṣaso vyuṣṭiṣu / (1.1) Par.?
mahī dyāvāpṛthivī cetatām apo 'dyā devānām ava ā vṛṇīmahe // (1.2) Par.?
divaspṛthivyor ava ā vṛṇīmahe mātṝn sindhūn parvatāñcharyaṇāvataḥ / (2.1) Par.?
anāgāstvaṃ sūryam uṣāsam īmahe bhadraṃ somaḥ suvāno adyā kṛṇotu naḥ // (2.2) Par.?
dyāvā no adya pṛthivī anāgaso mahī trāyetāṃ suvitāya mātarā / (3.1) Par.?
uṣā ucchanty apa bādhatām aghaṃ svasty agniṃ sam idhānam īmahe // (3.2) Par.?
iyaṃ na usrā prathamā sudevyaṃ revat sanibhyo revatī vy ucchatu / (4.1) Par.?
āre manyuṃ durvidatrasya dhīmahi svasty agniṃ sam idhānam īmahe // (4.2) Par.?
pra yāḥ sisrate sūryasya raśmibhir jyotir bharantīr uṣaso vyuṣṭiṣu / (5.1) Par.?
bhadrā no adya śravase vy ucchata svasty agniṃ sam idhānam īmahe // (5.2) Par.?
anamīvā uṣasa ā carantu na ud agnayo jihatāṃ jyotiṣā bṛhat / (6.1) Par.?
ā yukṣātām aśvinā tūtujiṃ rathaṃ svasty agniṃ sam idhānam īmahe // (6.2) Par.?
śreṣṭhaṃ no adya savitar vareṇyam bhāgam ā suva sa hi ratnadhā asi / (7.1) Par.?
rāyo janitrīṃ dhiṣaṇām upa bruve svasty agniṃ sam idhānam īmahe // (7.2) Par.?
pipartu mā tad ṛtasya pravācanaṃ devānāṃ yan manuṣyā amanmahi / (8.1) Par.?
viśvā id usrā spaḍ ud eti sūryaḥ svasty agniṃ sam idhānam īmahe // (8.2) Par.?
adveṣo adya barhiṣa starīmaṇi grāvṇāṃ yoge manmanaḥ sādha īmahe / (9.1) Par.?
ādityānāṃ śarmaṇi sthā bhuraṇyasi svasty agniṃ sam idhānam īmahe // (9.2) Par.?
ā no barhiḥ sadhamāde bṛhad divi devāṁ īḍe sādayā sapta hotṝn / (10.1) Par.?
indram mitraṃ varuṇaṃ sātaye bhagaṃ svasty agniṃ sam idhānam īmahe // (10.2) Par.?
ta ādityā ā gatā sarvatātaye vṛdhe no yajñam avatā sajoṣasaḥ / (11.1) Par.?
bṛhaspatim pūṣaṇam aśvinā bhagaṃ svasty agniṃ sam idhānam īmahe // (11.2) Par.?
tan no devā yacchata supravācanaṃ chardir ādityāḥ subharaṃ nṛpāyyam / (12.1) Par.?
paśve tokāya tanayāya jīvase svasty agniṃ sam idhānam īmahe // (12.2) Par.?
viśve adya maruto viśva ūtī viśve bhavantv agnayaḥ sam iddhāḥ / (13.1) Par.?
viśve no devā avasā gamantu viśvam astu draviṇaṃ vājo asme // (13.2) Par.?
yaṃ devāso 'vatha vājasātau yaṃ trāyadhve yam pipṛthāty aṃhaḥ / (14.1) Par.?
yo vo gopīthe na bhayasya veda te syāma devavītaye turāsaḥ // (14.2) Par.?
Duration=0.087028980255127 secs.