Texts

imāṃ dhiyaṃ saptaśīrṣṇīm pitā na ṛtaprajātām bṛhatīm avindat / (1.1) Par.?

turīyaṃ svij janayad viśvajanyo 'yāsya uktham indrāya śaṃsan // (1.2) Par.?

ṛtaṃ śaṃsanta ṛju dīdhyānā divas putrāso asurasya vīrāḥ / (2.1) Par.?

vipram padam aṅgiraso dadhānā yajñasya dhāma prathamam mananta // (2.2) Par.?

haṃsair iva sakhibhir vāvadadbhir aśmanmayāni nahanā vyasyan / (3.1) Par.?

bṛhaspatir abhi kanikradad gā uta prāstaud uc ca vidvāṁ agāyat // (3.2) Par.?

avo dvābhyām para ekayā gā guhā tiṣṭhantīr anṛtasya setau / (4.1) Par.?

bṛhaspatis tamasi jyotir icchann ud usrā ākar vi hi tisra āvaḥ // (4.2) Par.?

vibhidyā puraṃ śayathem apācīṃ nis trīṇi sākam udadher akṛntat / (5.1) Par.?

bṛhaspatir uṣasaṃ sūryaṃ gām arkaṃ viveda stanayann iva dyauḥ // (5.2) Par.?

indro valaṃ rakṣitāraṃ dughānāṃ kareṇeva vi cakartā raveṇa / (6.1) Par.?

svedāñjibhir āśiram icchamāno 'rodayat paṇim ā gā amuṣṇāt // (6.2) Par.?

sa īṃ satyebhiḥ sakhibhiḥ śucadbhir godhāyasaṃ vi dhanasair adardaḥ / (7.1) Par.?

brahmaṇaspatir vṛṣabhir varāhair gharmasvedebhir draviṇaṃ vy ānaṭ // (7.2) Par.?

te satyena manasā gopatiṃ gā iyānāsa iṣaṇayanta dhībhiḥ / (8.1) Par.?

bṛhaspatir mithoavadyapebhir ud usriyā asṛjata svayugbhiḥ // (8.2) Par.?

taṃ vardhayanto matibhiḥ śivābhiḥ siṃham iva nānadataṃ sadhasthe / (9.1) Par.?

bṛhaspatiṃ vṛṣaṇaṃ śūrasātau bhare bhare anu madema jiṣṇum // (9.2) Par.?

yadā vājam asanad viśvarūpam ā dyām arukṣad uttarāṇi sadma / (10.1) Par.?

bṛhaspatiṃ vṛṣaṇaṃ vardhayanto nānā santo bibhrato jyotir āsā // (10.2) Par.?

satyām āśiṣaṃ kṛṇutā vayodhai kīriṃ ciddhy avatha svebhir evaiḥ / (11.1) Par.?

paścā mṛdho apa bhavantu viśvās tad rodasī śṛṇutaṃ viśvaminve // (11.2) Par.?

indro mahnā mahato arṇavasya vi mūrdhānam abhinad arbudasya / (12.1) Par.?

ahann ahim ariṇāt sapta sindhūn devair dyāvāpṛthivī prāvataṃ naḥ // (12.2) Par.?