Texts

bṛhadrathantare vā asṛjyetām // (1) Par.?

te samānanidhane asṛjyetām antarnidhane vā bahirnidhane vā // (2) Par.?

te abrūtām ājim anayor nidhanayor ayāveti // (3) Par.?

tatheti // (4) Par.?

te ājim aitām // (5) Par.?

tad bṛhad udajayat // (6) Par.?

tad rathantaraṃ hīyamānam amanyata // (7) Par.?

tad abravīn mithune 'nte sānupūrvaṃ me yogaṃ prayaccheti // (8) Par.?

tatheti // (9) Par.?

tad asya mithunam abhavat // (10) Par.?

tasmā etaṃ pūrvaṃ yogaṃ prāyacchad etaṃ pūrvāhṇam // (11) Par.?

pūrvāhṇo ha vai rathantarasya yogo 'parāhṇo bṛhataḥ // (12) Par.?

as iti ha rathantarasya has iti bṛhataḥ // (13) Par.?

te haite aharnidhane satyanidhane // (14) Par.?

satyaṃ ha vā etayor nidhanam // (15) Par.?

tasmād ubhayasāmnā yajamāna āsāyam eva yajeta // (16) Par.?

ubhayam eva bṛhadrathantare ātte satyam iti // (17) Par.?

ubhe haivāsya bṛhadrathantare ātte bhavataḥ // (18) Par.?

tad āhur antarnidhane3 bṛhadrathantare bahirnidhane3 iti // (19) Par.?

ubhayam iti brūyād antarnidhane ca bahirnidhane ceti // (20) Par.?

idaṃ vai rathantaram // (21) Par.?

ado bṛhat // (22) Par.?

tayor idam evāntarikṣaṃ nidhanam // (23) Par.?

tenāntarnidhane // (24) Par.?

atha yat pareṇa divam antarikṣaṃ manyanta evaṃ pareṇa pṛthivīm āpas teno bahirnidhane iti // (25) Par.?

tad āhur bṛhadrathantarayor antar vāmadevyā3ṃ vāmadevye 'ntar bṛhadrathantare3 iti // (26) Par.?

ubhayam iti brūyād bṛhadrathantarayor antar vāmadevyaṃ vāmadevye 'ntar bṛhadrathantare iti // (27) Par.?

idaṃ vai rathantaram // (28) Par.?

ado bṛhat // (29) Par.?

idam evāntarikṣaṃ vāmadevyam // (30) Par.?

tena bṛhadrathantarayor vāmadevyam // (31) Par.?

atha yat pareṇa divam antarikṣaṃ manyanta evaṃ pareṇa pṛthivīm āpas teno vāmadevye bṛhadrathantare iti // (32) Par.?