Texts

indro vṛtram ahan // (1) Par.?

tasya śīrṣakapālam udaubjat // (2) Par.?

sa droṇakalaśo 'bhavat // (3) Par.?

tasmāt somaḥ samasravat // (4) Par.?

sa hāriyojano 'bhavat // (5) Par.?

taṃ vyacikitsat // (6) Par.?

juhavānī3 mā hauṣā3m iti so 'manyata // (7) Par.?

yaddhoṣyāmy āmaṃ hoṣyāmi // (8) Par.?

yan na hoṣyāmi yajñaveśasaṃ kariṣyāmīti // (9) Par.?

tam adhriyata hotum // (10) Par.?

so 'gnir abravīn na mayy āmaṃ hoṣyasīti // (11) Par.?

taṃ dhānābhir aśrīṇāt // (12) Par.?

taṃ śṛtam bhūtam ajuhot // (13) Par.?

yad dhānābhir hāriyojanaṃ śrīṇāti śṛtatvāya // (14) Par.?

śṛtam evainam bhūtaṃ juhoti // (15) Par.?

bahvībhiḥ śrīṇāti // (16) Par.?

etāvatīr evāsyāmuṣmiṃ loke kāmadughā bhavanti // (17) Par.?

atho khalv āhur etā vā indrasya pṛśnayaḥ kāmadughā yaddhāriyojanīr iti // (18) Par.?

tasmād bahvībhiḥ śrīṇīyāt // (19) Par.?

ṛksāme vā indrasya harī somapānau // (20) Par.?

tayoḥ paridhaya ādhānam // (21) Par.?

yad aprahṛtya paridhīñ juhuyād antarādhānābhyāṃ ghāsam prayacchet // (22) Par.?

prahṛtya paridhīñ juhoti // (23) Par.?

nirādhānābhyām eva ghāsam prayacchati // (24) Par.?

unnetā juhoti // (25) Par.?

yātayāmeva hy etarhy adhvaryuḥ svagākṛtaḥ // (26) Par.?

yad adhvaryur juhuyād yathā vimuktam punar yunakti tādṛg eva tat // (27) Par.?

śīrṣann adhinidhāya juhoti // (28) Par.?

śīrṣato hi sa samabhavat // (29) Par.?

vikramya juhoti // (30) Par.?

vikramya hīndro vṛtram ahan samṛddhyai // (31) Par.?

paśavo vai hāriyojanīḥ // (32) Par.?

yat saṃbhindyād alpā enam paśavo bhuñjanta upatiṣṭheran // (33) Par.?

yan na saṃbhindyād bahava enam paśavo 'bhuñjanta upatiṣṭheran // (34) Par.?

manasā saṃbādhate // (35) Par.?

ubhayaṃ karoti // (36) Par.?

bahava evainam paśavo bhuñjanta upatiṣṭhante // (37) Par.?

unnetary upahavam icchante // (38) Par.?

ya eva tatra somapīthas tam evāvarundhate // (39) Par.?

uttaravedyāṃ nivapati // (40) Par.?

paśavo vā uttaravediḥ // (41) Par.?

paśavo hāriyojanīḥ // (42) Par.?

paśuṣv eva paśūn pratiṣṭhāpayanti // (43) Par.?