Texts

upāṃśv anvāha // (1) Par.?

anirukto vā etarhy agnir yarhy avyāvṛttaḥ // (2) Par.?

tasmād upāṃśv anvāha // (3) Par.?

chandāṃsy anvāha // (4) Par.?

chandobhir vā agnir uttaravedim ānaśe // (5) Par.?

tasmāc chandāṃsy anvāha // (6) Par.?

sūryasya vā etad adhvānaṃ yanti yad aśvaṃ prāñcaṃ ca pratyañcaṃ cākramayanti // (7) Par.?

tasmād asā ādityaḥ prāṅ caiti pratyaṅ ca // (8) Par.?

prājāpatyo 'śvaḥ // (9) Par.?

yad aśvam ākramayati prajāpatinaivainaṃ cinute // (10) Par.?

apāṃ pṛṣṭham asi yonir agner iti puṣkaraparṇam upadadhāti // (11) Par.?

sva evainaṃ yonau cinute śāntyā anuddāhāya // (12) Par.?

vardhamāno mahāṃ ā ca puṣkara iti // (13) Par.?

vardhate hy eṣa yo bhavati // (14) Par.?

divo mātrayā variṇā prathasveti prathayaty eva // (15) Par.?

brahma jajñānaṃ prathamaṃ purastād iti rukmam upadadhāti // (16) Par.?

brahmamukhābhir vai prajāpatiḥ prajābhir ārdhnod ṛddhyai // (17) Par.?

ekaviṃśatinirbādho bhavati pratiṣṭhityai // (18) Par.?

ekaviṃśatir devalokāḥ // (19) Par.?

tebhya eva bhrātṛvyaṃ nirbādhate // (20) Par.?

adhastān nirbādhān kuryād bhrātṛvyasya nigṛhītyai // (21) Par.?

na pṛthivyāṃ nāntarikṣe na divy agniś cetavyaḥ // (22) Par.?

yat pṛthivyāṃ cinvītauṣadhīś śucā nirdahed yad antarikṣe vayāṃsi yad divi divam // (23) Par.?

amṛtaṃ hiraṇyam // (24) Par.?

yad rukmam upadadhāti amṛta evāgniṃ cinute // (25) Par.?

hiraṇyagarbhas samavartatāgra iti puruṣaṃ hiraṇyayam upadadhāti // (26) Par.?

yajamānalokam evaitena dādhāra // (27) Par.?

atho madhyejyotiṣam evāgniṃ cinute // (28) Par.?

drapsaś caskandety abhimṛśati // (29) Par.?

hotrāsv evainaṃ satye pratiṣṭhāpayati // (30) Par.?

sarpaśīrṣair upatiṣṭhate // (31) Par.?

mṛtyava evainaṃ paridadāti // (32) Par.?

atho yā sarpe tviṣis tām evāvarunddhe // (33) Par.?

yad upadadhyāt pramāyukas syāt // (34) Par.?

yat samīcīnam itaraiś śīrṣair upadadhyād grāmyān paśūn daṃśukās syur yad viṣūcīnam āraṇyān // (35) Par.?

yajur eva vadet // (36) Par.?

tenaiva tāṃ tviṣim avarunddhe tena śāntam // (37) Par.?

etasmāddha vai purāgnicitam adidṛkṣanta // (38) Par.?

sarvā hy etās tviṣīr avāruddha yāgnau yā sarpe yā sūrye // (39) Par.?

athaitad vāmadevasya rākṣoghnaṃ yajñamukhe // (40) Par.?

yajñamukhe vai yajñaṃ rakṣāṃsi jighāṃsanti rakṣasām apahatyai // (41) Par.?

pañcarcaṃ bhavati // (42) Par.?

pāṅkto 'gniḥ // (43) Par.?

yāvān evāgnis tasmād rakṣāṃsy apahanti // (44) Par.?

sarvā diśo 'nuparicāraṃ juhoti // (45) Par.?

digbhya eva rakṣāṃsi hanti // (46) Par.?

srucā upadadhāti // (47) Par.?

ime evaitad upadhatte // (48) Par.?

tūṣṇīm upadadhāti // (49) Par.?

na hīme yajuṣāptum arhati // (50) Par.?

ātmā vai puruṣaḥ // (51) Par.?

bāhū srucau // (52) Par.?

yat srucā upadadhāti sātmatvāya // (53) Par.?

dakṣiṇato vai devānāṃ rakṣāṃsy āhutīr niṣkāvam ādan // (54) Par.?

tāni kārṣmaryeṇāntaradadhata // (55) Par.?

yat kārṣmaryamayīṃ dakṣiṇata upadadhāti rakṣasām antarhityai // (56) Par.?

ghṛtena pūrayati // (57) Par.?

vajro vai kārṣmaryaḥ // (58) Par.?

vajro ghṛtam // (59) Par.?

vajra eva vajraṃ dadhāti // (60) Par.?

gāyatryopadadhāti // (61) Par.?

gāyatro vā agnir gāyatracchandāḥ // (62) Par.?

svenaivainaṃ chandasā samardhayati // (63) Par.?

dadhnaudumbarīṃ pūrayati // (64) Par.?

annaṃ vai dadhi // (65) Par.?

ūrg udumbaraḥ // (66) Par.?

anna evorjaṃ dadhāti // (67) Par.?

triṣṭubhopadadhāti // (68) Par.?

aindrī vai triṣṭup // (69) Par.?

annam indriyam // (70) Par.?

indriyam evānnādyam avarunddhe // (71) Par.?

iyaṃ vai kārṣmaryamayy asā audumbarī // (72) Par.?

yad audumbarīm uttarām upadadhāti tasmād asā asyā uttarā // (73) Par.?

mūrdhanvatī // (74) Par.?

mūrdhaivaitābhyāṃ kriyate // (75) Par.?

virājy agniś cetavyaḥ // (76) Par.?

srug vai virāṭ // (77) Par.?

yat srucā upadadhāti virājy evāgniṃ cinute // (78) Par.?