Texts

Select a text:
Bibliography

Select a chapter:
(no revisions)

Show parallels Show headlines
Use dependency labeler

Chapter id: 8055

nārada uvāca / (1.1) Par.?

idaṃ rasātalaṃ nāma saptamaṃ pṛthivītalam / (1.2) Par.?

yatrāste surabhir mātā gavām amṛtasaṃbhavā // (1.3) Par.?

kṣarantī satataṃ kṣīraṃ pṛthivīsārasaṃbhavam / (2.1) Par.?

ṣaṇṇāṃ rasānāṃ sāreṇa rasam ekam anuttamam // (2.2) Par.?

amṛtenābhitṛptasya sāram udgirataḥ purā / (3.1) Par.?

pitāmahasya vadanād udatiṣṭhad aninditā // (3.2) Par.?

yasyāḥ kṣīrasya dhārāyā nipatantyā mahītale / (4.1) Par.?

hradaḥ kṛtaḥ kṣīranidhiḥ pavitraṃ param uttamam // (4.2) Par.?

puṣpitasyeva phenasya paryantam anuveṣṭitam / (5.1) Par.?

pibanto nivasantyatra phenapā munisattamāḥ // (5.2) Par.?

phenapā nāma nāmnā te phenāhārāśca mātale / (6.1) Par.?

ugre tapasi vartante yeṣāṃ bibhyati devatāḥ // (6.2) Par.?

asyāścatasro dhenvo 'nyā dikṣu sarvāsu mātale / (7.1) Par.?

nivasanti diśāpālyo dhārayantyo diśaḥ smṛtāḥ // (7.2) Par.?

pūrvāṃ diśaṃ dhārayate surūpā nāma saurabhī / (8.1) Par.?

dakṣiṇāṃ haṃsakā nāma dhārayatyaparāṃ diśam // (8.2) Par.?

paścimā vāruṇī dik ca dhāryate vai subhadrayā / (9.1) Par.?

mahānubhāvayā nityaṃ mātale viśvarūpayā // (9.2) Par.?

sarvakāmadughā nāma dhenur dhārayate diśam / (10.1) Par.?

uttarāṃ mātale dharmyāṃ tathailavilasaṃjñitām // (10.2) Par.?

āsāṃ tu payasā miśraṃ payo nirmathya sāgare / (11.1) Par.?

manthānaṃ mandaraṃ kṛtvā devair asurasaṃhitaiḥ // (11.2) Par.?

uddhṛtā vāruṇī lakṣmīr amṛtaṃ cāpi mātale / (12.1) Par.?

uccaiḥśravāścāśvarājo maṇiratnaṃ ca kaustubham // (12.2) Par.?

sudhāhāreṣu ca sudhāṃ svadhābhojiṣu ca svadhām / (13.1) Par.?

amṛtaṃ cāmṛtāśeṣu surabhiḥ kṣarate payaḥ // (13.2) Par.?

atra gāthā purā gītā rasātalanivāsibhiḥ / (14.1) Par.?

paurāṇī śrūyate loke gīyate yā manīṣibhiḥ // (14.2) Par.?

na nāgaloke na svarge na vimāne triviṣṭape / (15.1) Par.?

parivāsaḥ sukhastādṛg rasātalatale yathā // (15.2) Par.?

Duration=0.10932087898254 secs.