Texts

brahmovāca / (1.1) Par.?

ataḥ paraṃ pravakṣyāmi tṛtīyaṃ guṇam uttamam / (1.2) Par.?

sarvabhūtahitaṃ loke satāṃ dharmam aninditam // (1.3) Par.?

ānandaḥ prītir udrekaḥ prākāśyaṃ sukham eva ca / (2.1) Par.?

akārpaṇyam asaṃrambhaḥ saṃtoṣaḥ śraddadhānatā // (2.2) Par.?

kṣamā dhṛtir ahiṃsā ca samatā satyam ārjavam / (3.1) Par.?

akrodhaścānasūyā ca śaucaṃ dākṣyaṃ parākramaḥ // (3.2) Par.?

mudhā jñānaṃ mudhā vṛttaṃ mudhā sevā mudhā śramaḥ / (4.1) Par.?

evaṃ yo yuktadharmaḥ syāt so 'mutrānantyam aśnute // (4.2) Par.?

nirmamo nirahaṃkāro nirāśīḥ sarvataḥ samaḥ / (5.1) Par.?

akāmahata ityeṣa satāṃ dharmaḥ sanātanaḥ // (5.2) Par.?

viśrambho hrīstitikṣā ca tyāgaḥ śaucam atandritā / (6.1) Par.?

ānṛśaṃsyam asaṃmoho dayā bhūteṣvapaiśunam // (6.2) Par.?

harṣastuṣṭir vismayaśca vinayaḥ sādhuvṛttatā / (7.1) Par.?

śāntikarma viśuddhiśca śubhā buddhir vimocanam // (7.2) Par.?

upekṣā brahmacaryaṃ ca parityāgaśca sarvaśaḥ / (8.1) Par.?

nirmamatvam anāśīstvam aparikrītadharmatā // (8.2) Par.?

mudhā dānaṃ mudhā yajño mudhādhītaṃ mudhā vratam / (9.1) Par.?

mudhā pratigrahaścaiva mudhā dharmo mudhā tapaḥ // (9.2) Par.?

evaṃvṛttāstu ye kecil loke 'smin sattvasaṃśrayāḥ / (10.1) Par.?

brāhmaṇā brahmayonisthāste dhīrāḥ sādhudarśinaḥ // (10.2) Par.?

hitvā sarvāṇi pāpāni niḥśokā hyajarāmarāḥ / (11.1) Par.?

divaṃ prāpya tu te dhīrāḥ kurvate vai tatastataḥ // (11.2) Par.?

īśitvaṃ ca vaśitvaṃ ca laghutvaṃ manasaśca te / (12.1) Par.?

vikurvate mahātmāno devāstridivagā iva // (12.2) Par.?

ūrdhvasrotasa ityete devā vaikārikāḥ smṛtāḥ / (13.1) Par.?

vikurvate prakṛtyā vai divaṃ prāptāstatastataḥ / (13.2) Par.?

yad yad icchanti tat sarvaṃ bhajante vibhajanti ca // (13.3) Par.?

ityetat sāttvikaṃ vṛttaṃ kathitaṃ vo dvijarṣabhāḥ / (14.1) Par.?

etad vijñāya vidhival labhate yad yad icchati // (14.2) Par.?

prakīrtitāḥ sattvaguṇā viśeṣato yathāvad uktaṃ guṇavṛttam eva ca / (15.1) Par.?

narastu yo veda guṇān imān sadā guṇān sa bhuṅkte na guṇaiḥ sa bhujyate // (15.2) Par.?