Texts

yudhiṣṭhira uvāca / (1.1) Par.?

brāhmaṇyaṃ yadi duṣprāpaṃ tribhir varṇair narādhipa / (1.2) Par.?

kathaṃ prāptaṃ mahārāja kṣatriyeṇa mahātmanā // (1.3) Par.?

viśvāmitreṇa dharmātman brāhmaṇatvaṃ nararṣabha / (2.1) Par.?

śrotum icchāmi tattvena tanme brūhi pitāmaha // (2.2) Par.?

tena hyamitavīryeṇa vasiṣṭhasya mahātmanaḥ / (3.1) Par.?

hataṃ putraśataṃ sadyastapasā prapitāmaha // (3.2) Par.?

yātudhānāśca bahavo rākṣasāstigmatejasaḥ / (4.1) Par.?

manyunāviṣṭadehena sṛṣṭāḥ kālāntakopamāḥ // (4.2) Par.?

mahān kuśikavaṃśaśca brahmarṣiśatasaṃkulaḥ / (5.1) Par.?

sthāpito naraloke 'smin vidvān brāhmaṇasaṃstutaḥ // (5.2) Par.?

ṛcīkasyātmajaścaiva śunaḥśepo mahātapāḥ / (6.1) Par.?

vimokṣito mahāsatrāt paśutām abhyupāgataḥ // (6.2) Par.?

hariścandrakratau devāṃstoṣayitvātmatejasā / (7.1) Par.?

putratām anusaṃprāpto viśvāmitrasya dhīmataḥ // (7.2) Par.?

nābhivādayate jyeṣṭhaṃ devarātaṃ narādhipa / (8.1) Par.?

putrāḥ pañcaśatāścāpi śaptāḥ śvapacatāṃ gatāḥ // (8.2) Par.?

triśaṅkur bandhusaṃtyakta ikṣvākuḥ prītipūrvakam / (9.1) Par.?

avākśirā divaṃ nīto dakṣiṇām āśrito diśam // (9.2) Par.?

viśvāmitrasya vipulā nadī rājarṣisevitā / (10.1) Par.?

kauśikīti śivā puṇyā brahmarṣigaṇasevitā // (10.2) Par.?

tapovighnakarī caiva pañcacūḍā susaṃmatā / (11.1) Par.?

rambhā nāmāpsarāḥ śāpād yasya śailatvam āgatā // (11.2) Par.?

tathaivāsya bhayād baddhvā vasiṣṭhaḥ salile purā / (12.1) Par.?

ātmānaṃ majjayāmāsa vipāśaḥ punar utthitaḥ // (12.2) Par.?

tadāprabhṛti puṇyā hi vipāśābhūnmahānadī / (13.1) Par.?

vikhyātā karmaṇā tena vasiṣṭhasya mahātmanaḥ // (13.2) Par.?

vāgbhiśca bhagavān yena devasenāgragaḥ prabhuḥ / (14.1) Par.?

stutaḥ prītamanāścāsīcchāpāccainam amocayat // (14.2) Par.?

dhruvasyauttānapādasya brahmarṣīṇāṃ tathaiva ca / (15.1) Par.?

madhye jvalati yo nityam udīcīm āśrito diśam // (15.2) Par.?

tasyaitāni ca karmāṇi tathānyāni ca kaurava / (16.1) Par.?

kṣatriyasyetyato jātam idaṃ kautūhalaṃ mama // (16.2) Par.?

kim etad iti tattvena prabrūhi bharatarṣabha / (17.1) Par.?

dehāntaram anāsādya kathaṃ sa brāhmaṇo 'bhavat // (17.2) Par.?

etat tattvena me rājan sarvam ākhyātum arhasi / (18.1) Par.?

mataṃgasya yathātattvaṃ tathaivaitad bravīhi me // (18.2) Par.?

sthāne mataṃgo brāhmaṇyaṃ nālabhad bharatarṣabha / (19.1) Par.?

caṇḍālayonau jāto hi kathaṃ brāhmaṇyam āpnuyāt // (19.2) Par.?